𝐌𝐢𝐧𝐢𝐬𝐭𝐞̀ 𝐊𝐨𝐧𝐝𝐢𝐬𝐲𝐨𝐧 𝐅𝐚𝐧𝐦 𝐚𝐤 𝐃𝐰𝐚 𝐅𝐚𝐧𝐦 (𝐌𝐊𝐅𝐃𝐅) 𝐫𝐞𝐯𝐨𝐥𝐭𝐞 𝐚𝐤𝐨̀𝐳 𝐯𝐲𝐨𝐥 𝐤𝐨𝐥𝐞𝐤𝐭𝐢𝐟 𝐚𝐤 𝐚𝐬𝐚𝐬𝐢𝐧𝐚𝐲 𝐤𝐢 𝐟𝐞̀𝐭 𝐬𝐨𝐮 𝐲𝐨𝐧 𝐚𝐝𝐨𝐥𝐞𝐬𝐚𝐧 𝟏𝟑 𝐥𝐚𝐧𝐞 𝐧𝐚𝐧 𝐯𝐢𝐥 𝐋𝐚𝐬𝐤𝐚𝐰𝐨𝐛𝐚𝐬 𝐞𝐩𝐢 𝐩𝐰𝐨𝐦𝐞̀𝐭 𝐈 𝐚𝐩 𝐬𝐮𝐢𝐯 𝐝𝐨𝐬𝐲𝐞 𝐚 𝐝𝐞𝐩𝐫𝐞̀ 𝐣𝐨𝐮𝐤 𝐤𝐨𝐮𝐩𝐚𝐛 𝐲𝐨 𝐣𝐢𝐣𝐞 𝐞𝐩𝐢 𝐩𝐢𝐧𝐢 𝐬𝐞𝐥𝐨𝐧 𝐥𝐚𝐥𝐰𝐚

Se avèk anpil tristès Ministè Kondisyon Fanm ak Dwa Fanm aprann nouvel asasinay Leica Domont, yon tifi ki gen selman 31 lane, aprè li fin sibi vyol kolektif yon gwoup endividi fè sou li, nan komin Lascahobas nan depatman Sant peyi a, 17 jiyè 2024 la.

Selon enfòmasyon yo, se ta bòpè viktim nan ak yon lòt endividi ki komèt krim nan epi lage l nan yon twou. Nan sans sa a, Ministè kondisyon Fanm ak Dwa Fanm (MKFDF), atravè kowòdinasyon sant lan, pral chita prese prese ak otorite lajistis yo, pou limyè fèt sou dosye sa a, pou tout koupab yo ka jije selon lalwa.

Ministè a ap fè tout moun sonje, pratik kriminèl sa yo ki vize Fanm ak Tifi, pa kadre ditou ak angajman Leta ayisyen pran atravè divès Akò, Trete ak Konvansyon il siyen nan sa ki gen pou wè ak vyolans k ap fèt sou fanm ak tifi. Pami yo nou ka site Konvansyon Entè-Amerikèn pou Prevni, Pini epi Elimine Vyolans sou Fanm (Konvansyon Belém do Pará) ki se yon trete entènasyonal, Komisyon Entè-Amerikèn pou Fanm (CIM) nan Òganizasyon Eta Ameriken yo et siyen pandan yon konferans ki te fèt nan vil Belèm do Para nan peyi Brezil, nan dat 9 jen 1994.

Ministè a pwofite okazyon sa a pou lanse yon apèl bay tout popilasyon an pou l pa tolere move pratik sa yo nan lantouraj yo pandan l ap mande yo denonse agresè yo, yon mannyè pou Lapolis ak Lajistis kapab arete epi pini yo komsadwa. Li pa nòmal pou fanm ak tifi kontinye ap sibi zak vyolans sa yo toujou nan sosyete a. Nou pap janm rive gen yon sosyete ekilibre si dwa fanm ak tifi yo pa respekte. Pou tèt sa a chak sitwayèn, chak sitwayen dwe pote kole ak Ministè, ak tout lòt òganizasyon k ap batay kont vyolans sou Fanm, pou kwape fenomèn kriminèl sa a

Ministè Kondisyon Fanm ak Dwa Fanm koube l byen ba devan kadav Leica Domont epi li voye senpati l bay fanmiy li, pandan l ap fè konnen l ap suiv dosye a deprè, yon mannyè pou fanmi sa kadejakè kriminèl kite ak dlo nan je, jwenn jistis ak reparasyon.

Vyolans sou Fanm ak Tifi konsène nou tout, ann mete ansann pou n kwape fenomèn sa a !

Marie Françoise SUZAN

Minis